Клуб янгиликлари

Драган Черан: "Голлар ҳақида ўйламагандим, бу ўз-ўзидан рўй берди"

Клуб янгиликлари

"Пахтакор"нинг охирги икки мавсумдаги тўпурарига айланган Драган Черан "Қўқон-1912" билан ўйиндан олдин Геннадий Красницкий клубига аъзолик нишонини қабул қилди. Бу нишон Ўзбекистон чемпионати ва Кубоги, Осиё клублар мусобақаларида 100та гол урган футболчига топшириб келинади. Шу муносабат билан Драган ушбу соврин ва юртимиздаги фаолияти хусусида саволларга жавоб берди.

100тадан ортиқ гол уриб, Геннадий Красницкий клубига аъзо бўлдингиз. Бу билан сизни табриклаймиз.
- Бундан жуда хурсандман. Ўзбекистондаги фаолиятимда юзтадан ортиқ гол урган ҳолда катта футболчилар қаторига қўшилдим. Уларнинг қаторида эканимдан бахтиёрман. Ўз навбатида бу яна ва яна голлар уришим учун иштиёқ беради.

Ўзбекистонга келишдан аввал фаолиятингиз шунчалик муваффақиятли чиқиши ҳақида ўйлар бўлганми?
- Бу ерга келганимда голлар тўғрисида ўйламагандим. Бу ўз-ўзидан рўй берди. Чунки жуда яхши савияли клубларда ўйнадим. Ўйлашимча, Ўзбекистондаги энг кучли икки жамоа сафида тўп тепдим.

Ўтган йили жамоада ижрочилар маҳорати юқори эди. Бу йил олдинда кўпроқ ёшлар билан ўйнаяпсиз. Бу қандай кечмоқда?
- "Пахтакор"нинг таркиби ўтган йилга нисбатан кескин ўзгарган. Ёш, куч ва иштиёққа тўла ёш футболчилар сафимизда бор. Улар туфайли биз ҳамон яхши ўйнаяпмиз ва бу йўлдан юришни давом эттиришни истаймиз.