Клуб янгиликлари

Превью. "Пахтакор" - "Андижон"

Клуб янгиликлари
Суперлигада мавсумни якунлаб берувчи турда "Шерлар" Тошкентда "Андижон"ни меҳмон қилишади.

2020 йилги мавсумни чемпион сифатида якунлаётган "Пахтакор" чемпионатдаги охирги учрашувни ўз майдонида ўтказади. Суперлигада қолиш учун кураш олиб бораётган "Андижон" кескин қаршилик кўрсатишга уриниши табиий. Шу сабабли мухлисларни қизиқарли ўтадиган баҳс кутиб турганига шубҳа йўқ. Қолаверса, ажойиб мавсум учун жамоа ва ишқибозларнинг бир-бирига миннатдорчилик билдириши учун ҳам бу яхши.

Ҳозирга қадар жамоалар чемпионатларда 49 бор тўқнаш келишган. Улардан 37тасида "Шерлар" ғалаба қозонган бўлса, 8 баҳсда дуранг натижа қайд этилган. Фақат 4 марта "Андижон" футболчилари муваффақиятга эришган. Рақиб дарвозасини 122 марта ишғол қилган жамоамиз 34 гол ўтказиб юборган. Тошкентда ўтказилган 24 баҳснинг 21тасида жамоамиз зафар қучган. 3 баҳсда эса кучлар тенг келган. Охирги марта рақиб Тошкентда 2010 йил очкога эришган. Юқори лигада "Андижон" кўп мавсум ўйнагани сабабли мазкур жамоалар тўқнашуви ҳам тарихий учрашувлардан ҳисобланади. Ўтган йили жамоамиз уйда 5:1 ҳисобида зафар қучган.

Ўзаро ўйинлардаги энг йирик натижа - 6:0 ҳисоби 2015 йил Тошкентдаги учрашувда кузатилган. Ўшанда жамоамиз шундай йирик ғалабага эришган. Жами ғалабаларнинг 15таси рақиб устидан йирик ҳисобдаги натижалар билан қўлга киритилган.

"Пахтакор" ва "Андижон" жамоалари ўртасидаги ўйин 3 декабрь, пайшанба куни соат 14:00да "Пахтакор" стадионида бошланади.