Клуб янгиликлари

"Пахтакор" футбол клуби Президенти Бобур Шодиев ва "Сўнмас юлдузлар" халқаро хайрия жамғармаси Президенти Юрий Боционов келишувга имзо чекишди.

"Пахтакор" - "Қизилқум" учрашувига Андрей Канчельскиснинг ташриф буюргани ҳақида хабар бергандик. Ушбу ташриф доирасида у вице-президент сифатида фаолият олиб бораётган жамғарма "Пахтакор" футбол клуби билан ҳамкорлик меморандумини имзолади. Унга клубимиз Президенти Бобур Шодиев ва турли ҳалокатларда ҳаётдан кўз юмган футболчиларнинг оиласига ёрдам берувчи "Сўнмас юлдузлар" хайрия жамғармаси президенти Юрий Боционов имзо чекишди.

Унга кўра, келажакда ушбу жамғарма кўмагида "Пахтакор-79" жамоаси хотирасига бағишланган хайрия учрашувлари ташкил этилади. "Пахтакор" футбол клуби жамоа ва ўзбек футболи ривожланиши йўлида хизмат қилган барча инсонлар меҳнатини муносиб қадрлайди, уларни ҳурмат қилади ва ёдга олади. Хайрия учрашувлари катта ижтимоий лойиҳа эканини доимо англайди.

Хайрия ўйинлари ўтказиш орқали ўсиб келаётган ёш авлодда "Пахтакор"нинг собиқ аъзоларига нисбатан ғурур ҳиссини уйғотиш, уларни клуб тарихидан хабардор этиш мақсадлари ҳам кўзланган.

Ушбу жамғарма турли ҳалокатлар туфайли ҳаётдан кўз юмган спортчилар оилаларига моддий кўмаклашиш, турли мамлакатларда оммавий футболни ривожлантиришга ёрдам бериш, футбол академиялари очиш билан шуғулланади. Россияда яқинда Андрей Канчельскис академияси ишга туширилди. Бундай академияни Ўзбекистонда ҳам очиш мўлжалланмоқда.

Ушбу ҳамкорлик натижасида "Пахтакор"нинг 1979 йилдаги авиаҳалокатига бағишлаб, жорий йил Ўзбекистоннинг турли шаҳарларида турнир ўтказиш мўлжалланган. Унда жаҳонга машҳур клубларнинг 23 ёшгача ва фахрий таркиблари иштирок этишлари режалаштирилмоқда. Турнирда иштирок этишга розилик билдирган жамоалар номи тез орада маълум бўлади.